Таматы ад 3 рублёў, агуркі таннейшыя за бульбу. Што прадаецца на Камароўцы ў выходныя
Нягледзячы на дрэннае надвор’е і скаргі фермераў, сезонная гародніна на Камароўцы працягвае падаць у цане і часам каштуе нават менш, чым маладая бульба. Паступова апускаецца і цэннік на ягады. Чым выгадна закупляцца на рынку ў гэтыя выхадныя, пішуць Мінск-навіны.
Лета, хай сабе і дажджлівае, у самым разгары, і асартымент рынку працягвае папаўняцца. З апошніх сезонных навінак можна адзначыць зялёную спаржавую фасолю: яе пакуль што мала, таму цэннік трымаецца на ўзроўні 15 рублёў.
Пачаткі цукровай кукурузы ўжо можна набыць на многіх месцах, іх кошт вагаецца ад 5,90 да 7 рублёў за кілаграм.
Белакачанная капуста выстаўлена па 2 рублі, прайс на кветкавую і брокалі пачынаецца з 2,50 рубля.
Агуркі можна купіць ад 2,50 рубля, памідоры — ад 3 рублёў. За кілаграм краснадарскіх памідораў-слівак трэба заплаціць усяго 4,50, на рубель даражэй можна знайсці чэры — для іх гэта казачная цана, бо часцей за ўсё яны выстаўлены па 12—18 рублёў.
Асарці з жоўтых, карычневых і малінавых — па 8,50 рубля. Балгарскі перац — ад 6,50, раннія буракі і морква ад фермераў — па 3—5 рублёў. Кіло кабачкоў абыдзецца ўсяго ў 1,50 рубля.
Маладой беларускай бульбы шмат, але цэны на яе трымаюцца. Танней за 2,50 рубля вы наўрад ці знойдзеце, сярэдні прайс па рынку — 3‑4 рублі. На адным з прылаўкаў, выдзеленых для гандлю фізічнымі асобамі, напэўна, самы добры асартымент на Камароўцы — больш дзясятка ранніх і сярэдне-ранніх сартоў, у тым ліку папулярныя «скарб», «паролі» і «вектар». Самую танную «адрэту» важаць па 2,50 рубля, «каралеву Ганну», «першацвет» і «баярскую» — па 4,50 рубля.
— Гэта беларуская бульба, не імпартная — вы не думайце. Вырошчваем у Самахвалавічах, дзе знаходзіцца Інстытут бульбаводства, таму і такі вялікі выбар. Я вырошчваю шэсць, астатнія — прадукцыя майго стрыечнага брата. Але вы бачыце — чарга да нас не стаіць, — аповед фермера тут жа перарывае пакупніца, якая просіць узважыць два кілаграмы «скарбу».
На рынак ужо завезлі першыя яблыкі новага ўраджаю. Невялікія цвёрдыя плады з Узбекістана каштуюць 4,50 рубля, тады як мінулагоднія ўсё яшчэ прадаюць па 7,50 рубля. Узбекскія слівы — і таго менш — 3,90 рубля. Па 4,90 рубля можна ўзяць кіло дробных нектарынаў, недарагія персікі — на рубель-два даражэйшыя. Азербайджанскія дыні і кавуны — па 5,90 рубля.
Пік продажаў чарэшні паступова пераходзіць, хоць салодкіх ягад яшчэ дастаткова, а цэны пачынаюцца ад 13 рублёў. Затое сезон беларускіх дурніцаў у самым разгары, і ягады на галоўны рынак сталіцы вязуць з усіх беларускіх рэгіёнаў.
Прайс на дурніцы пачынаецца ад 16 рублёў. Ягады папулярных сартоў «д’юк» і «блюкроп» выцясняе «патрыёт» — раяніраваны ў Беларусі сорт, які зараз набірае папулярнасць.
Парэчкі ў паўлітровых шклянках — па 6 рублёў, агрэст — па 7 рублёў, маліны — па 10 рублёў. Ягады выгадней браць кілаграмамі: парэчкі — па 13, чарніцы і агрэст — па 20 рублёў. Вішню прадаюць па 10 рублёў звычайную і па 15 рублёў шпанку.
На Камароўцы трохі патаннелі разнастайныя салаты і зеляніна. Рамэн, фрызэ, маслянічны, лола роса, рамана і пак-чой па 10—15 рублёў за кіло. Пучкі духмянай рукалы і кінзы — па 2 рублі за 100 г, шпінат, кроп, мангольд і пятрушка — па 1,50 рубля. Столькі ж прыйдзецца заплаціць за лісце кейла. Зялёная цыбуля таннейшая — па 80 капеек.
-
У выніку пажару на «Кераміне» аб'ём вытворчасці заўважна ўпадзе. А ўзгаранне магло быць ускосным наступствам санкцый
-
Нацбанк хоча забараніць у Беларусі разлікі з дапамогай крыптавалют
-
Мяркуючы па пасажырапатоку транспарту, насельніцтва Беларусі з 2019-га скарацілася, можа, нават на 1,2 мільёна чалавек
Цяпер чытаюць
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей16
Каментары