Журналіста ў Бабруйску асудзілі на 10 сутак, а жонцы ў міліцыі загадалі распрануцца цалкам
Сяргей Лацінскі быў затрыманы ў пятніцу, 19 чэрвеня, на акцыі ў Бабруйску і да панядзелка быў за кратамі. У панядзелак суд пастанавіў, што Лацінскі — журналіст і назіральнік БХК — сваёй прысутнасцю на акцыі «жывы ланцуг» 19 чэрвеня парушыў заканадаўства аб масавых мерапрыемствах, піша БАЖ.
Пакаранне — дзесяць сутак арышту паводле арт. 23.34 КаАП за ўдзел у несанкцыянаваным масавым мерапрыемстве.
Вечарам яго адпусцілі дадому з высокай тэмпературай, пакаранне ён будзе адбываць пазней.
Сержука затрымалі разам з жонкай, Алесяй Лацінскай, сябрам БАЖ, журналісткай мясцовага партала bobr.by. Яна асвятляла акцыю па заданні рэдакцыі, але гэта не было нейкім важкім аргументам для супрацоўнікаў АМАПа.
Алеся распавяла, што ў УУС Бабруйскага гарвыканкама, куды іх даставілі пасля затрымання, падчас дагляду яе прымусілі цалкам распрануцца.
«Мяне адвялі ў пакой асабістага дагляду. Там са мной былі дзве жанчыны-міліцыянткі. Яны загадалі зняць сарафан, станік, і нават майткі, — распавяла Алеся. — Некалькі секунд глядзелі на мяне, потым сказалі апранацца. Перад гэтым папярэдзілі, што любая нязгода з загадамі будзе трактавацца як непадпарадкаванне законным патрабаванням супрацоўнікаў міліцыі».
Алеся была адзінай, каго даглядалі так «старанна».
«Мяркую, што гэта было зроблена, каб паказаць мне маё месца, прынізіць, і каб запужаць іншых жанчын, маўляў, вось што з вамі можа быць, калі затрымаюць на пікеце», — лічыць журналістка.
Алесю адпусцілі пасля складання пратакола апытання.
«Міліцыянт не дазволіў мне ні з кім паразмаўляць, вывеў на вуліцу, і сказаў — ідзі займайся дзіцём», — кажа Алеся. (У сям’і Лацінскіх пяцігадовы сын.)
Каментары