Намеснік міністра сказаў, што захворванне на каранавірус у некаторых рэгіёнах зніжаецца. Вось толькі лічбы не назваў
Пра гэта паведаміў журналістам першы намеснік міністра аховы здароўя Дзмітрый Піневіч, перадае БЕЛТА.
Раней за ўсё ў звычайны рэжым працы пачалі вяртацца ўстановы аховы здароўя, арыентаваныя на пацыентаў з каранавірусам, у Віцебскім рэгіёне. Нядрэннае становішча і ў Магілёўскай вобласці, адзначыў першы намеснік міністра.
«Быў рост захворвання ў Брэсцкай вобласці, прытым практычна па ўсіх буйных гарадах, але захворванне таксама ідзе на спад.
У Гомельскім рэгіёне ёсць некаторыя пытанні. Я заўтра туды выязджаю, нашы спецыялісты там таксама папрацавалі, міністр нядаўна быў», — сказаў Дзмітрый Піневіч.
Сітуацыя ў абласцях знаходзіцца пад кантролем кіраўніцтва Міністэрства аховы здароўя. «Мы трымаем сітуацыю на ручным кіраванні, у першую чаргу для аказання кансультацый і метадычнай дапамогі», — дадаў першы намеснік міністра.
Беларусь ці не адзіная краіна Еўропы, дзе не называецца лічбы захварэлых па рэгіёнах (апошні раз па абласцях агучвалася ў красавіку). У той жа Літве і Эстоніі прыводзіцца не толькі падрабязная статыстыка па кожным раёне, але нават па ўзроставых групах. Існуюць спецыяльныя анлайн-мапы, дзе кожны ахвотны можа паглядзець падрабязную інфармацыю.
Каментары