Заснавальнік Facebook Марк Цукерберг мяркуе, што ўжо ў хуткім часе штучны інтэлект сацыяльнай сеткі зможа распазнаваць патэнцыйных тэрарыстаў, гвалтаўнікоў і самагубцаў. У сваім апублікаваным лісце з падрабязным планам развіцця Facebook ён паведаміў, што на стварэнне адпаведных алгарытмаў можа спатрэбіцца некалькі гадоў.
Раней эксперты звярталі ўвагу на тое, што злачынцы перад сваімі дзеяннямі могуць актыўна карыстацца сацыяльнымі сеткамі, таму іх злачынствы тэарэтычна можна спрагназаваць.
«Мы распрацоўваем сістэму, якая б магла аналізаваць тэкст і выявы, каб праверыць, ці не здарыцца якая-небудзь небяспека. Мы будзем рабіць усё, каб штучны інтэлект мог адрозніваць навіны пра тэрарызм ад тэрарыстычнай прапаганды», — адзначыў заснавальнік Facebook.
Цукерберг прызнаў і памылкі Facebook у выдаленні спрэчнага кантэнту.
Нагадаем, што спрэчкі і шырокае абмеркаванне правіл сацсеткі выклікала выдаленне з Facebook знакамітага фотаздымка Ніка Ута часоў в’етнамскай вайны «Жах вайны» са старонкі буйнейшай у Нарвегіі газеты Aftenposten. На гэтай выяве аголеная в’етнамская дзяўчынка бяжыць ад напалму, і адміністрацыя сацыяльнай сеткі пабачыла там дзіцячую парнаграфію.
Заснавальнік Facebook адзначыў, што кожны дзень праз сацыяльную сетку праходзяць мільярды паведамленняў і публікацый, таму проста фізічна немагчыма адсочваць кожны такі выпадак. Усе спрэчныя выпадкі выдалення кантэнту Цукерберг назваў «памылкамі», якія плануецца выправіць новымі алгарытмамі.
У кожнай культуры і нават у кожнай асобы свае ўяўленні пра дазволеныя межы аголенасці, гвалту і брыдкаслоўя, таму заўсёды знаходзіліся незадаволеныя правіламі Facebook. Новыя алгарытмы дазволяць самому чалавеку выбіраць, якая інфармацыя вартая таго, каб патрапіць у стужку. Таксама межы дазволенага будуць залежаць ад рэгіёна, дзе знаходзіцца чалавек.
Дадзены план Цукерберга падтрымалі эксперты па анлайн-бяспецы і праваабаронцы, якія раней крытыкавалі сацыяльную сетку за цэнзуру і непразрыстыя правілы для публікацый.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць4949
Каментары