Прэзідэнт ЗША Барак Абама адмаўляе магчымасць ваеннай канфрантацыі паміж НАТА і Расіяй. Такое меркаванне ён выказаў у інтэрв'ю тэлеканалу CBS.
На пытанне аб тым, ці ёсць верагоднасць ваеннага канфлікту, Абама адказаў: «Не, я не думаю, што будзе ваенная канфрантацыя паміж Расіяй і НАТА». Пры гэтым ён дадаў, што ЗША «вельмі шмат працавалі», каб супакоіць саюзнікаў па альянсе ва Усходняй Еўропе.
Абама нагадаў, што пяты артыкул Паўночнаатлантычнай дамовы абавязвае ўсіх саюзнікаў аказваць ваенную дапамогу ў выпадку, калі хто-небудзь з членаў альянсу стане аб'ектам нападу.
«І Пуцін гэта разумее», — сказаў Абама.
На думку амерыканскага лідара, існуе магчымасць таго, што Расія будзе «рухацца ў патрэбны бок» у сітуацыі з украінскім крызісам. Пры гэтым Абама асудзіў дзеянні Масквы на фоне пратэстаў і наступнага развіцця падзей, накіраваныя на «ўтрыманне Украіны ў сваёй арбіце».
Прэзідэнт ЗША таксама адзначыў значэнне санкцый супраць Расеі, якія «вельмі дрэнна» адбіліся на яе эканоміцы. «І гэта дрэнна і для будучыні Расіі», — дадаў ён.
Як адзначыў кіраўнік амерыканскай адміністрацыі, ён неаднаразова заяўляў, што такая палітыка з'яўляецца для Расіі «тупіком», і Масква павінна вярнуцца да спробаў выконваць міжнародныя нормы.
Гэта, на яго думку, «будзе лепш і для расійскага народу, і для Еўропы». Такую пазіцыю Абама, паводле яго слоў, даносіў і да расійскага прэзідэнта Уладзіміра Пуціна ў прыватным парадку, і выказваў публічна.
«Мы не шукаем канфрантацыі, але мы збіраемся быць вельмі цвёрдымі, калі на кану стаяць прынцыпы», — падкрэсліў Абама.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць4848
Каментары